Napuji ma Tuhanta Naibata na dob padiparhon hita hubani tahun na baru tahun 2011. Idop ni uhur-Ni tumang do in anggo bani panorang on boi ope hita dihut mamasuki tahun na baru on. Ibagas malas ni uhur ampa gok tarimakasih padasonnami ma hubani nasiam: “Selamat Tahun Baru 2011”. Ambah ni ai i tongah-tongah ni suasana tahun na baru on sihol sisei- onnami do nasiam marhitei piga-piga hata ondos-ondos ampa tonah :
1. Tahun Baru na dob imasuki hita panorang on, ai ma sada kesempatan baru na ilayakkon Naibata laho pabayuhon uhur, sura-sura pakon tekadta mandalankon horja pandiloon-Ni hubanta bei. Tahun 2011 lang pitah sekedar sambatni tahun 2010, tapi botul-botul do sada tahun na baru na mandilo hita laho pabayuhon pargoluhanta secara pribadi, sonai homa pargoluhon i tongah-tongah ni kuria ampa masyarakat.
2. Tahun Baru 2011 on sihol do homa pagolpahon hita selaku halak Kristen ampa selaku kuria laho martarimakasih hubani Tuhan halani kesetiaan pakon idop ni uhur-Ni na dob mam- pargogohi pakon mambobai hita mandalani Tahun 2010. Ihatarimakasihkon hita tahun na salpu na dob itadingkon hita janah imasuki hita tahun na baru laho mandaihon pasu-pasu ampa idop ni uhur sonai campurtangan ni Naibata bani goluhta. Sintong ma na hinatahon ni Tuhanta marhitei Apostel Paulus: “Huhalupahon do na i pudingku, huparayak na i lobeihu” (Pil.3:13).
3. Isadari hita do bahasa Tahun 2011 on pe totap do iwarnai tantangan pakon hamaholon. Tapi hansi pe sonai, tongtong do Tuhanta na gabe hagogohon banta, anjaha ihaporsayai hita do hata-Ni na mangkatahon: ”Ulang ma haru uhurnasiam pasal atap aha pe, tapi pabotohkon nasiam ma pangindoannasiam bani Naibata marhasoman tonggo, elek-elek ampa tarima kasih” (Pil.4:6). Marhitehonni ai, aha pe tantangan na sihol idompakkon hita bani tahun 2011 on, boi do ai gabe kesempatan na maharga banta laho membaharui diri sonai homa kurianta.
4. Sadalan hubani haputusan ni Sinode Bolon GKPS pa-40 bani tahun na salpu, itotapkon do bahasa Tahun 2011 ai ma Tahun Pembinaan Warga Gereja GKPS marhasoman tema: “Hita do Saksini Kristus” (Lah.1:8) pakon sub tema: “Pasirsir hita ma Kuria in Ase Matoras Ibagas na Mandalankon Pandiloon ni Tuhan”. Sihol ma haganup pagori ni GKPS sonai kepengurusan bani ganup tingkatan berperanserta mensukseskon horja on. Andohar horja na madear on marbuahkon pembaharuan i tongah-tongah ni kurianta manuju hubani persekutuan na lambin berkualitas anjaha dinamis janah tongtong “gabe pasu-pasu anjaha sari hubani haganup jolma”.(Visi Misi GKPS 2010-2030).
Salam pakon tonggo,
Pimpinan Pusat GKPS,
Pdt.Jaharianson Saragih, STh.MSc.Ph.D Pdt.El Imanson Sumbayak, MTh
E p h o r u s Sekretaris Jenderal
