~Tonggo...

Bahan Cermah pasal Ibadah : Tonggo

TONGGO

Parlobei ni

Tonggo atap martonggo sasintongni gabe sada horja na lang boi sirangkonon humbani goluh ni halak na porsaya. Marhitei tonggo do na porsaya in marpardomuan atap berkomunikasi hubani Tuhan Naibata. Somal isobut, ‘tonggo aima hosah ni haporsayaon’. Mararti, na so mangkagoluhkon tonggo ai, dos songon na dob matei mando haporsayaonni.

Ibagas praktekni ididah hita do bahasa buei ope anggotanta na so manghagoluhkon tonggo on. Deba ma ai hurang ringgas mandalankon anjaha adong ope songon na segan atap lang ibotoh martonggo. Sungkun-sungkunta, naha nani keluarga na sonai ai; bulus ma sidea lang martonggo age laho mangan?

Masalah na legan, namin martonggo do sada halak tapi lang iahapkon arti khusus ni tonggo ai; songon hasomalan na so marnidok do ai bani goluhni. Deba nari, ra buei isobut hita hata bani tonggo tapi bueinan do hunjai lang idalankon, anjaha siparahan anggo suhar-suhar ni tonggo ai do use goluhni.

Agepe lang ope haganup masalah ni tonggo igorani hita ijon, sonari boi ma iidah hita na porlu tumang do tonggo on banta. Aha do ai, sonaha na patut hita mandalankon ai anjaha aha-aha masalah domu hujai; ganupan on porlu ma parlajaranta. Sura-suranta marhitei on, ase haganup hita lang pitah mambotoh arti ni tonggo atap boi martonggo tumang, tapi andohar hita gabe Kristen sipartonggo.

Arti ni Tonggo

Boi ma sobutonta paboa tonggo aima parsahapan ni jolma pakon Naibata. Parsahapan mararti do homani ai komunikasi dompak Naibatanta. Tonggo aima balos atap hataridahan ni haporsayaonta hu-Bani. Marhitei ai ma hita pajumpah pakon Naibata secara pribadi atap kollektif pe. Marhitei tonggo, iontang Tuhanta do ase roh hita hu-Bani, anjaha talup balosta ‘domma roh ahu Tuhan, bohiMu do na hupindahi’ (Psalm 27:8).

Arti ni tonggo on boi do idahonta homa humbani guna ni ai bani goluhta. Tonggo aima gogohta laho mandompakkon ganup tantangan age laho manlawan munsuh ni haporsayaonta (Efesus 6). Ai do parhiteian ni Naibata mambalosi ampa mangurupi hita (Jakobus 4:8). Marhitei tonggo, lang be ibagas holsoh atap bumbang ni uhur be hita (Pilippi 4:6-7). Anjaha lang igoki/irajai dunia on be hita, tapi Tuhan in sandiri ma na marhorja pakon manrajai goluhta.

Agepe maha tahu (omni science) do Naibata, tapi porlu do hita martonggo laho pataridahkon pardomuan atap haporsayaonta bani Naibata. Jesus sandiri pe manaksihon pasal ai. Tapi isuruh do susianNi ase totap martonggo janah Ia sandiri pe manggoluh ibagas tonggo do. Marhitei na martonggo, ipataridahkon hita na sada do hita hu-Bani anjaha anak ampa hasomanNi do hita.

Martonggo mararti do homa ai marondos hubani Naibata ibagas Jesus Kristus. Artini ai, bani na martonggo; ibuha hita uhurta ase marianan Ia ijai. Kristus na mangidangi ronsi na manrajai goluhta. Gok bani ma goluhta. Martonggo mararti do homa mangkawah hita tongtong hu-Bani. Ia ma pusat ni goluh ronsi tujuanta pe. Ia ma homa na mambere gogoh banta. Ibagas tonggo gabe taridah ma sonaha hita na marondos huBani. Gabe ra hita isondangi Tuhanta. Ia ma na paliharhon pakon patorsahon goluhta. Ase bagas do na hinamkam ni tonggo ai, ungkapan ni haporsayaonta na manggoluh do ai.

Masalah-masalah ni Tonggo

Buei do masalah na jumpah bani tonggo atap banta ibagas na martonggo. Masalah ijon marpardomuan do hubani teologia ni sandiri atap bani caranta pe. Piga-piga na marpardomuan hunjai aima :

a.     Hotop iahaphon hita songon na lang marbalos tonggonta atap songon na lang ra Naibata mambalosi ai. Bahkan iahapkon hita songon na mulak hubanta do use ai. Sabotulni buei do masalah na marpardomuan hujon. Bani Bibelta sandiri iidah hita do, rap manggalang/martonggo do si Kain pakon Abel. Tapi galangan ni Abel do na ijalo. Lobih paltak use itaurhon Naibata do marhitei nabi Jesaya ‘... agepe ipagati hanima martonggo, seng tangaronku ai;... ‘(Jesaya 1:15). Aha do arti ni on? Parlobei, goluh pakon haporsayaon ni na martonggo ai do sipareksaon. Mase pala itulak atap seng itangihon Tuhan tonggonta. Na paduahon, talup ma na pinindota ai bani rosuh ni Naibata? Atap rosuh ampa sura-suranta tumang do na gabe isini tonggonta. Janah na patoluhon, ningon botohonta do paboa bebas do Naibata bani tindakan ampa keputusanNi. Agepe memang siparidop ni uhur do Ia. Janah na parpudi, tonggo na ipadas hita hubani Naibata; domma sintong ibagas Jesus ai ipadas hita? Atap ibagas na legan do tonggo ai iondoskon hita hubani Tuhan in.

b.     Sipata halani rutin mando tonggo ai, pangkorhonni gabe hasomalan na so marnidok do use ai banta. Isobut somal, songon gerakan ni masin otomatis do ai. Gejalani, martarima kasih hita ningon bani tonggonta, hape lang nyata atap lang pala na botoh aha hataridahanni sitarima-kasihkonon ai bani goluhta. Atap, ipindo hita do hasasapan ni dousa; hape torus do hita mardousai tanpa adong perobahan banta. Ipangindo hita do ase ipargogohi Tuhan hita laho mangkorjahon rosuhNi, tapi lanjar do lang ihorjahon hita ai. Sipata mamuji Naibata do hita ningon, tapi singgan pamangan do hansa. Pakon contoh na legan boi ididah hita paboa tonggonta ai hotop songon na mampar atap mangambang hansa. Ase porlu do sintong partonggonta, ibagas bulat ni uhur anjaha ibagas Tuhan in ma.

c.      Songon na ipinsang Tuhan Jesus bani Mateus 6:5-8; ‘...ulang ma martonggo hita marganjang-ganjang, atap ipajenges-jenges hita ase ipuji halak. Hal on boi jumpah tarlobih bani tonggo umum atap tonggo syafaat. Memang jenges ma anggo atur kalimatta anjaha totor isobuti hita masalah-masalah ijai. Tapi sintong do motifta ibagas ai? Hotop do lupa hita na hubani Tuhan Naibata do hita na martonggo ai. Mabuei tu do itimbangi hita reaksi ni na legan. Siporlunan sabotulni tonggonta pribadi, na buni tapi na botul iharosuhkon Naibata. Siparahanni ma anggo tonggonta lurlur tapi goluhta sandiri pendur. Iondolhon Jakobus do homa on bani Jakobus 4:3; ‘Mangindo do namin nasiam, tapi seng manjalo, halani salah pangindoan nasiam, ai sihol parbois-boiskonon nasiam do ai marhitei hisap-hisap nasiam’. Ijon ma porluni sonaha ase goluhta sandiri romban hubani tonggonta. Martonggo ibagas hasintongan pakon haporsayaon. Ia lang pe ganup tonggonta tarhorjahon hita, gendo ulang suhar ni ai goluhta

d.     Dong do deba martonggo ase dapotan hansa atap songon na mamaksa Naibata use. Halak Kristen martonggo sedo ase isuhuni pangindoanni tapi martonggo pataridahkon hasadaon pakon haporsayaon do. Bahkan tonggo ai ipadas hita ibagas tarima kasih na gok do. Domu hujon, boi do pardiateihonta; bahatan do ungkapan ni tonggonta na marpardomuan pakon pangindoanta. Ase panorang ni ma banta laho patorsahon tonggonta humbani na egosentris hubani na theosentris.

e.      Hotop do hita martonggo ibagas uhur na lang bulat/terpusat atap mampar. Ra do homa martonggo sada halak ibagas na hampung atap ginjang ni uhur. Sonai homa deba na mangkatahon paboa lang ibotoh martonggo. Pasal on ningon do sadar hita bahasa martonggo ai ma marsahap bani Naibata do. Halani ai, uhur ampa sikapta pe romban hujai ma ibahen. Sobali haporsayaon, tontuni bani na martonggo porlu do adong sikap laho marlatih na taratur. Ai na marhasuhuton bani Tuhan in do hita ijai.

Na Porlu bani Tonggo

Dob ididah hita piga-piga pergumulan na marpardomuan pakon tonggo, itoruh on sobuton do use piga-piga hal na gabe syarat ibagas na martonggo. Marhitei na mambotoh pakon na mandalankon on andohar lambin torsa ma partonggoanta.

a. Haporsayaon

Haporsayaon do syarat na utama bani tonggo, halani ungkapan ni haporsayaon do tonggo ai. Lang mungkin sada halak martonggo anggo lang porsaya ia bani ‘alamat’ ni tonggo ai. Lang mungkin tarjalo hita bagah-bagah ni Jesus ;Pindo ma sai na bereonNi do anjaha pindahi ma sai na jumpahannima do (Matius 7:7). Anggo hita sandiri pe hurang porsaya do pasal on. Ase haporsayaon do na parlobei, on ma parlobei pindoonta. Agepe lang  mungkin sempurna haporsayaonta ningon barani do hita mangkatahon ‘Porsaya do ahu Tuhan, urupi Ham ma ahu na so porsaya on’. Porsaya ijon mararti yakin hita, gok holong ampa idop ni uhur do Ia na sirsir mangurupi hita. Anjaha ibotoh do ganup ronsi na porlu banta pe.

b. Toruh ni uhur

Halani na pajumpah atap marsahap pakon Naibata do hita ibagas tonggo, ningon do ibagas toruh ni uhur. Ningon martoruh ni uhur halani selaku jolma pardousa na so talup do namin hita roh hu-Bani. Tuhan na gok ibagas hamuliaon ampa hapansingon, tapi hita gok ibagas dousa ampa hahurangan. Kesadaran na sisonon boi homa patorsahon caranta ibagas na martonggo ai. Pasal on, ratah ope banta sonaha Jesus mamuji partonggo ni sijalo sohei ai, na manompuk tontonni anjaha paunduk uluni ibagas toruh ni uhur. Marhitei toruh ni uhur iidah hita ma na so talup namin hita marpardomuan hu-Bani. Marhitei ai ma homa iidah hita hinabagas ni holong ampa idop ni uhur ni Tuhan hubanta. Janah bani ujung ni tonggonta ninta ma : ‘rosuhMu ma na saud Tuhan’

c. Bulat ni uhur

Bulat pakon bulus ni uhur porlu tumang do ibagas na martonggo. Pasal on, bani na martonggo hita ningon ibagas na botul-botul tarbuka do hita ilobei ni Naibata. Ai do ase ihatahon Jesus: ‘Martuah ma na borsih uhur, ai idahon ni sidea do Naibata’. Sedo guro-guro tonggo ai, anjaha lang malo mampar uhurta panorang na martonggo hita. Sipindoonta ma ase igoki Tonduy ni Naibata hita ibagas na martonggo ai. Dalan hujai ai ma anggo botul-botul ibagas bulat ni uhur hita anjaha ungkap bani Naibata sanggah na martonggo hita huBani. Ai do ase isobut Psalmen ‘Pabulat Ham ma uhurhu mangkabiari Ham’ (Psalm 86:11)

d. Hinsah ni uhur

Hinsah ni uhur ampa haboranian pe, termasuk do syarat na porlu do bani na martonggo. Ipatangkas do ai bani Heber 4:16. Arti ni, lang pala segan atap sangsi hita roh huBani. Tapi ibagas hinsah ni uhur anjaha keyakinan na gok hita. Bani situasi na sonon igomoskon si Jakob do ‘Lang paluahonku Ham Tuhan anggo lape ipasu-pas Ham ahu’ (1 Musa 32:26). Memang lang boi paksaonta Naibata, tapi ningon ibagas gok keyakinan do hita martonggo. Lang mungkin iarapkon hita sada pangindoan anggo hita sandiri pe sangsi do. Sabotulni ibagas hinsah ni uhur na maronjolan hubani haporsayaon on do marhasil age horjanta pe. Anjaha na gabe onjolan ni haganupan on hubani Tuhanta, alamat ni tonggo ai, Naibata siparholong anjaha paridop ni uhur na tarsulur do.

e. Hahormatan

Domma namin isobut ilobei pasal toruh ni uhur, tapi domu hubani cara bani tonggo ai porlu ope ondolhonon pasal na hormat on. Hormat hita halani itandai hita haetekonta anjaha na niarapkon ai ma idop ni uhur Ni tumang do. Hormat ibagas na mansahapkon tonggo ai ronsi bani cara atap sikapta sandiri pe. Hinorhon ni ai ma ase ilompit hita tanganta manrogop hu Bani. Anggo siparugama na legan tene, halani hormat ni gabe sujud do use das hu tanoh. Ase na maharga botul do anggo boi hita martonggo ibagas toruh ampa bulat ni uhur anjaha idalankon ai ibagas na hormat.

f. Tonggo ibagas/marhitei Jesus

Agepe domma iarbishon tulisan on ilobei pasal on, ijon mutlak do onjolhonon bahasa ningon ibagas janah marhitei Jesus do hita martonggo. Ia sandiri do na mamboan atap na padomuhon hita bani Bapa in, ai nini do : ‘Ahu do dalan, hasintongan ampa hagoluhan’ (Johannes 14:6). Bani na legan isobut use ningon ibagas goran Ni do hita mangindo ase itangihon Naibata. Ibagas Jesus ma hita porsaya, sibalosi tonggo do Tuhan Naibata; ai ma ihabujurhon anjaha idalankon hita.

Isi ni Tonggo

Ningon tarsingatonta do homa ijon pasal aha ma na porlu, na gabe isi ni tonggonta. Marhitei isi ni tonggo on, gabe boi do homa idahon bentuk sasintongni. Maronjolan hubani tonggo na niajarhon ni Jesus (Matius 6:9-13). Isi ni tonggo ai ma : 1. Pangindoan, 2. Tarimakasih ampa 3. Puji-pujian.

1. Pangindoan    

Marhasuhutan atap patugahkon pangindoan bani Naibata ai ma hal na umum bani tonggonta. Ibagas on sedo soal na mangindo ai hansa na porlu tapi mansuhutkon atap patugahkon pangindoan ai do. Anjaha ibagas na mangindo ai pe, Jesus sandiri mangajarhon ase parlobei do pindoonta na porlu bani harajaon ni Tuhan sedo na porlu banta sandiri. Dob sonai ibahen hita, selaku na porsaya pindo atap hasuhuthononta ma homa na porlu banta sandiri. Ijon ma porlu hubungan na erat, anjaha tarbuka bani Tuhanta pasal ganup goluhta. Ai do ase nini apostel Paulus ‘Pabotohkon nasiam ma pangindoan nasiam bani Naibata marhasoman tonggo, elek-elekampa tarimakasih’ (Pilippi 4:6). Bani na marsuhutan on hita ningon do rimpunta songon na binahen ni Jesus ‘... rosuh Mu ma na saud’. Ai saguru Bani do ganup na masa, goluh ronsi pasal hasasaud ni pangindoanta pe. Bani tonggo ni Paulus, lang ibere pangindoanni tapi marbalos do Naibata nini “Sungkup do idop ni uhurHu bam, ibagas hagalekon do Ahu margogoh’ pakon hata na legan, sedo apala dapot ni pangindoan na porlu tapi balos ni Naibata domu hujai do.  Humbani haganupan in ningon do suhuthononta ganup masalah ni ta hu-Bani, Ia do hansa alamat ni ai na sasintongni.

2. Martarimakasih

Martarimakasih bani Naibata ai ma hawajiban ni jolma na manggoluh, khusus ni halak Kristen. Ai do ase iondolhon bani Epesus 5:20 ‘Tongtong ma nasiam mangkatahon tarimakasih halani haganup bani Naibata Bapa ibagas Goranni Tuhan Jesus Kristus’. Sedo namin apala tarimakasihta ai na pinalar ni Naibata, tapi ningon do martarimakasih hita halani ganup na binahenNi bani goluhta. Hansi sedo hal na urah ai, songon na taridah bani Lukas 17:11-19, sanggah na ipamalum Jesus sapuluh halak na gadamon. Pitah sada halak hansa na mulak martarimakasih bani hamalumon na jinaloni. Mase sonai, balos na pondok halani hotop arganan do bani jolma sibere-bere anjaha urah lupa bani sipambere. Bani na martarimakasih hita hubani Naibata, ijai ma hita pasangapkonSi selaku sumber ni hagoluhanta. Anjaha onjolan ni tarimakasihta ai ma halani na dob pinaluah pakon pinagoluhNi do hita.

3. Puji-pujian

Mamuji Naibata aima ciri ni kehidupan na porsaya. Age bani Padan Nabasaia tarlobih bani Psalmen domma ihagoluhkon bangsa ni Naibata ai. Piga-piga na boi catatanta : paruhur na borsih do mamuji Naibata (Psalm 33:1), ningon pujian do Ia humbani gok ni uhur (Psalm 103:1), sadokah manggoluh hita (Psalm 146:2), bahkan bani ganup panorang (Psalm 34:2). Anjaha ningon pujion do Jahowa halani habanggalonNi (Psalm 150:2). Mamuji anjaha martarimakasih bani Naibata aima dua hal na so tarpisah bani goluhta. Tarimakasihta ningon pataridahkonon do marhitei puji-pujian anjaha ganup puji-pujian ningon marondolan bani uhur na martarimakasih hubani Naibata. Haduasi on idalankon hita ibagas na pasangapkon Tuhan in.

Mamuji Naibata age marhitei tonggo aima ciri kehidupan ni naporsaya. Jesus sandiri pakon apostel-apostel in pe ihagoluhkon do ai (Mat.11:25, 6:13, 2 Kor. 9:15). Bani Pangungkapon 13, isobut do memang bahasa pamujion na gok jumpah do inagori atas, bani hamonangan ni Tuhan bani ari parpudi ai, hansi lang mungkin torsa holi ai bahenonta anggo sadokah itanoh on pe lang ihorjahon hita ai. Ase sonari ma panorang ni ai ningon dalankononta ai secara pribadi pakon marhitei na riap pe (Ep. 5:19, Kol.3:16).

Parpudi, pangindoan, tarimakasih ampa puji-pujian ningon gabe isi ni tonggonta. Agepe marbeda sipata tekanan ni bani tonggonta, tapi hatolusi do ai ningon taridah. Boi sobutonta homa marhitei na sonai botul-botul ma Tuhan Naibata iakui hita Tuhanta bonani haganup anjaha gabe alamat ni tonggonta sandiri.

Sadihari do martonggo?

Halani tonggo ningon do gabe goluh banta porlu do sahapkononta homa sadihari do hita talup/ningon martonggo. Onjolanta mansahapkon on aima na binahen ni Jesus sandiri pakon na dob tarsurat bani Bibelta.

-         Torang do isobut bani Markus 1:35 bahasa paima marhorja Tuhan Jesus, girah sogot martonggo do Ia bani ianan na lungun. Tonggo gabe mungkah ni haganup kegiatan anjaha gogoh mangkorjahon horja. Patut ma sonai bahenonta homa. Girah sogot martonggo, parlobei martarima kasih pasal borngin na dob ibontas hita anjaha marondos pakon mangindo gogoh ampa pasu-pasu bani ganup horja ronsi goluhta bani na sada ari ai.

-         Bani Luk. 6:12 pe isobut do homa bahasa bani borngin martonggo do Jesus dob manlahoi horjaNi sonai pakon manranggihon haganup na sihol boluson patarni. Hita pe ningon sonai do dalankononta selaku pribadi, keluarga atap bani kuria pe. Tarimakasihkononkon do ari na dob ipakei hita anjaha pindoon do pasu-pasu ni Tuhan bani ganup horjanta na dob in, ronsi mangindo pangurupion pasal na sihol sibahenonta. Ijai ma hita marondos homa hu tanganNi na gok holong anjaha na pansing in.

-         Hun sudut na legan ningon do ondolhononta bahasa Jesus parlobei martonggo do bani na sihol mangkorjahon atap aha pe. Idahonta do ai ; paima mamilih susianNi (Luk.6:12), paima mangidangi halak (Mark. 1:35), paima mambere mangan lima ribu halak, bahkan paima mandalani sitarononNi pe (Luk. 22:41-42). Tontu ningon sonai ma bahenonta selaku halak Kristen, atap aha pe na sihol horjahononta ningon do ibagas Tuhan in, na ipadas ai marhitei tonggo.

-         Bani Mat. 14:23 isobut do homa bahasa martonggo do Jesus dob mangkorjahon lahouanNi. Hita pe ningon sonai do. Sedo pitah bani na mamungkah tapi dob salosei pe ningon do martarimakasih hita anjaha mangindo pasu-pasu bani haganup na dob ihorjahon hita. Halani na mangkorjahon do hansa tapi anggo na manjadihon pakon na mamasu-masu Tuhanta sandiri do.

-         Ibagas tugas pangidangionNi hosei atap sibuk botul do Tuhan Jesus. Buei do jolma roh hu-Bani (Luk. 5:15-16), isosak halak do Ia (Mark. 3:20) anjaha gabe lang sompat mangan (Mark. 6:31), tapi ibagas na sonin buei ni horjaNi songon na manosak deba, isompathon Jesus do martonggo. Pakon hata na legan, martonggo do Ia ibagas hasibukonNi, ai do gogohNi. Pasal on, ijon ma buei hita na hatadingan; hotop lang sompat martonggo be sada halak/keluarga halani kesibukan ni bei: bapa, inang atap niombah. Tapi sabotulni na so sintong do ai, ai halak na ringgas marhorja do sompat marminggu atap manggoluh ibagas tonggo. Botoh hita ma, kunci kesuksesan ni Martin Luther ai ma marhitei na pasuhihon diri martonggo tolu jam ibagas na sadari. Sonaha do hita nani?

-         Bani na mandompakkon sitaronon banggal sanggah iGetsemane, martonggo do Jesus (Mat. 26:36), pala isobut Lukas manghatektek hadogasNi songon daroh. Boi ma ibayangkon hita sonaha pongkut pakon serius ni Ia na martonggo ai, halani Bapa in sandiri do iahapkon na boi mangurupiSi manlopusi sitaronon banggal ai. Pasal on namin bueinan do halak Kristen mandalankon. Hansi sonaha ma pos ni uhurta ibagas ai? Gogoh ni Tuhan tumang do hansa na ipangajamkon hita? Janah anggo sanggah marsitaronon hansa sirsir hita martonggo, ai lang na dos songon goluh ni sihirput hansa ai : pugul anggo tappar, anggo lang jogar.

-         Bani ujungni ningon rimpunhononta do bahasa ningon do martonggo hita bani ganup panorang pakon keadaan (1 Tes. 5:17, Ef. 6:18). Martonggo ibagas toruh ni uhur, hasintongan ampa Tonduy Napansing ai do na gabe goluhta.

Kelompok Doa

Bani na mansahapkon tonggo on hita, hinaotikni porlu do arbisonta pasal kelompok doa. Deba humbanta domma manandai tumpuan on, aima kelompok na adong itongah-tongah ni ha-Kristenon na mangondolhon pitah tonggo na gabe pusat ni aktivitas ni. Kelompok on sabotulni sedo pitah ibagas Gereja Protestan tumang tapi dong do homa bani gereja na legan songon RK misalni.

Ase boi lambin tangkas na tanda sidea, porlu do botohon sonaha partubuh ni kelompok on; khususni i negara-negara Barat. Parlobei, bani negara-negara na maju tubuh do rasa kekecewaan, jiwa na hampa, anjaha agama/Gereja iahapkon lang boi mangisi kebutuhan ni partonduyon ni sidea. paduahon, inegara-negara berkembang pe, hinorhon ni hamiskinon pakon sitaronon ipindahi jolma do bentuk ha-Kristenan na baru ase boi sidea tarapoh. Patoluhon, ilmu teologia pe mengalami kegoncangan do khususni dob porag dunia II, ija iahapkon jolma songon na lang margogoh be Naibata. Paopathon, jumpah buei masam ni naborit ni jolma. Jumpah homa parugamaon na damok, kemerosotan moral, sikap apatis anjaha bani situasi on gareja pe hurang boi mangidangi kuria in domu hubani masalah ni. Haganup na iatas in mangkorhon ‘erosi iman’ bani ha-kristenon. Hinorhon ni ai martubuhan ma kelompok-kelompok doa na mamindahi bentuk ha-kristenon na baru. Deba sidea mangadongkon kegiatan ibagas gereja tapi na deba nari memisahkon diri do humbani gereja na resmi. Pakon pondok , partubuh ni kelompok on ; sahali boi ma on gabe kritik hubani situasi masyarakat pakon gareja, anjaha na paduahon; kelompok on sihol mamindahi bentuk ha-kristenon na baru, ija iondolhon pitah tonggo na gabe siporlunan. Buei do reaksi na koras dompak kelompok on. Tapi boi do cataton piga-piga hal na positif humbani kegiatan on. Parlobei, sidea manokanhon pertobatan pribadi, gabe Kristen maningon parlobei mananda janah porsaya hubani Jesus. Na paduahon, hasadaonni na porsaya botul-botul do iutamahon anjaha ningon legan do ai humbani atap aha pe. Patoluhon, bani tumpuan ni sidea iutamahon do bahasa tonggo pakon puji-pujian na gabe hataridahan ni haporsayaon na sintong. Paopathon, mangondolhon bahasa gabe Kristen ningon boi marsaksi sadalan hubani Lahoan 1:8. Palimahon, sidea sihol mamindahi talenta-talenta na dob ilupahon, age das bani na pamalumkon na boritan marhitei tonggo ni sidea.

Tapi legan ni na positif, adong do homa unsur na negatif humbani kelompok doa. Na tangkas taridah aima marhitei na menganggap diri atap kelompokni lebih pansing marimbang hasoman na legan. Menganggap tonggo ni sidea sijengesan marimbang model atap isi tonggo ni gereja na legan. Marhiteihon ai, porlu do hita totap mengevaluasi ampa menjaga sonaha kelompok doa na adong itongah-tongahta. Ase ulang adong na menganggap diri ni sebagai kelompok atap pribadi na memiliki kelebihan marimbang hasoman na legan ibagas na martonggo. Ase domu hubani haganupan ai, ningon ondolhonon do paboa tonggo sedo laho papuligkon diri atap mambahen kesombongan iman apalagi mangkorhon parbolah-bolahan. Sebalikni, marhitei tonggo ase ganup kuria mangkagoluhkon haporsayaon na sintong, martoruh ni uhur anjaha saling marsitonggoan. Martonggo aima manutup mata tapi mambuha uhur hubani Tuhan pakon hubani hasoman na legan. Marhitei tonggo roh torsani ma pardomuanta dompak Naibata sonai age bani jolma. Janah roh jenges ni ma hasadaon pakon pangidangion ikuria in.

Panutup

Domma buei isahapi hita pasal tonggo ampa masalah na berhubungan pakon ai. Tujuanni haganupan on naha ase hita botul-botul manghagoluhkon ai. Gabe Kristen ningon do manggoluh ibagas tonggo, songon Tuhan Jesus; ija goluhNi itonggohon anjaha tonggoNi ihagoluhkon.

Itoruh on isadur hanami do piga-piga ayat na tarsurat bani Bibelta na marpardomuan bani parlajaranta pasal tonggo :

-         Martonggo artini : jongjong hu lobeini Naibata, marturiak ilobei ni Tuhan, mangarap bani Naibata janah manggoluh humbani Naibata (Jakobus 5:17-18).

-         Lambin roh hotop ni hita martonggo, ijai do parroh ni pasu-pasu hubanta (Psalm 20:7, 21:3-4,7).

-         Usih do tonggo bani sada oase, na boi mambere gogoh bani na manoruskon pardalananni das hubani siparayakonni (Psalm 95:1-3).

-         Markuasa do sahap, marhagogohon pingkiran; tapi gogohan hunjai ai ma tonggo (1 Samuel 30:6).

-         Anggo maronti sada halak Kristen gabe sipartonggo, ijai ma marolob-olob sibolis in (Jesaya 35:3).

-         Tarmasuk do bani tonggo na sintong hasirsironta jongjong ibagas harosuh ni Naibata (Psalm 40:2,9).

Bahan diskusi

Itoruh on isobut hanami do piga-piga hal na gabe bahan diskusi banta :

1.     Aha do deba masalah na mambahen hurang ihagoluhkon hita (kuria in), tonggo on?

2.     Sobali anjuran pakon dalan na dob ibahen GKPS; aha do deba na porlu sibahenon ase kurianta boi manghagoluhkon tonggo?

3.     Selaku parhorja ni kuria ham, aha ma na boi bahenon manogu-nogu kuria in ase gabe Kristen sipartonggo?

4.     Boi ma pungkahonta bani dirinta pribadi sonai age marhitei keluarga, ase ibahen hita panorang khusus untuk martonggo?

Kelompok Kerja Tahun PWG GKPS 2011                  

~Tata ibadah Minggu kemitraan

Tata Ibadah

 Minggu Kemitraan GKPS

Minggu 15 Mei 2011

                                        

Tema :

Hita Do Saksi ni Kristus

(Lahoan Ni Apostel 1:8)

Sub Tema :

Pasirsir Hita ma Kuria in Ase Matoras Ibagas

na Mandalankon Pandiloon ni Tuhan

(Epesus 4:11-14)

Tata Ibadah Minggu Kemitraan GKPS

Minggu 15 Mei 2011

I.  Persiapan Ibadah

II. Ibadah

1.     Votum – Introitus- Tonggo

      P.      Ibagas goran ni Naibata Bapa, pakon Tuhan Jesus Kristus ampa Tonduy Napansing, Sitompa langit pakon tanoh on

      K.     Amen

      P.      Marolob-olob ma bani Naibata, nasiam ganup tanoh on. Dodingkon nasiam ma hamuliaon ni goranNi ,sombahkon nasiam ma Bani puji-pujian na marmulia

      K.     Haleluya,  puji ma Naibata  

               Mandodingkon (Haleluya  no 402 : 1a)

               Puji ma Naibatanta bai ianan na pansingNi in

                    Bai paratas hamulioanNiin, Haleluya Haleluya puji ma Naibata

                    Pasangap ma goranNi halani pambahenanNi in

                    Ampakon hagogohonNi in Haleluya Haleluya pasangap Naibata.

      P.      Pinuji ma Naibata , Bapa ni Tuhanta Jesus Kristus na mangkasiholhon ase  marsihaholongan sonai homa ase marsihargaan hita bani goluhta.

      K.     (Mandodingkon) Haleluya Haleluya puji ma Naibata

      P.      Tonggor ma naha  dearni ampa naha jengesni, anggo rap hundul na marsanina

      K.     (Mandodingkon) Haleluya Haleluya puji ma Naibata

      P.      Usih hubani minak na maharga na bani ulu ai, na manjalir hujambek, humbani jambek ni si Aron na mangkatektek hu rambu ni pakeanni

      K.     (Mandodingkon) Haleluya Haleluya puji ma Naibata

      P.      Usih bani namur ni dolog Hermon, na sogop bani dolog Sion. Ai hujai do ipasogop Jahowa pasu-pasu hagoluhan ronsi sadokah ni dokahni.

      K.     (Mandodingkon) Haleluya Haleluya puji ma Naibata

      P.      Martonggo ma hita !

               Ham Tuhan Jesus Kristus Raja Siparmonang. Ham do Tuhan na dob mambere pardameian    bannami.  Banggal tumang do holongMu, iajari Ham do hanami ase ipataridahkon hanami goluh parsaninaon marhitei na marsiarusan janah marsihargaan.  Suruh Ham ma Tonduy Napansing marmaloi  hanami ase lambin ididah hanami pardameian  na humBamu. Hu Bamu do isombahkon hanami olob-olob ampa puji-pujian  sadokah goluhnami. Amen

2.Mandoding Haleluya No  298 :. 1-2

1. Ai na marsanina hita on hape, Lang be marnamubah barang ise pe Legan bei hatanta ge tanohta pe, sada do Bapanta dingat hita bei

2. Sada do Bapanta Sipagoluh in, mansarihon hita sadokahni in  Haganup goluhta ge bohalta pe, sada do Bapanta pasirsirhon in

3. Hasasapan ni Dousa

      P       Riap ma hita jongjong ! Martonggo ma hita mangindo hasasapan ni dousata hubani Tuhan Naibata.Ham Tuhan Naibata Bapanami, maila tumang do hanami anggo idingat hanami pambahenan na hurang dear hubani na hinaholongan ni uhur nami. Ihatahon hanami sidea do tampuk ni pusu-pusunami, hape bani pambahenan  gati do kecewa sidea, halani uhur na marayoh janah  lansei  gabe lolei hanami bani tanggungjawabnami, malahan  ujung ni  hotop do tarjadi gabe hanami do use mangkarui uhur ni hasomannami.

      K.     (Mandodingkon laguni sarupa pakon lagu Deideng ) Tuhan holong ma Ham bannami Bapa,  holong ma Ham

      P.      Padaoh ham ma humbannai uhur na lang parduli bani hasoman, halani marhiteihonni ai  gabe maseda do ahapni hasomannami dompak hanami . Gati do homa hanami pitah mamingkirhon dirinami sandiri. Isalahkon hanami do hasomannami, pangkorhonni gabe maseda ma hasadaon, hadameion i rumah tangga sonai age bani lingkungannami.

      K .    (Mandodingkon laguni sarupa pakon lagu Deideng ) Tuhan holong ma Ham bannami Bapa,  holong ma Ham

      P.      Gati do homa hanami lang patuh bani aturan. Pangkorhon ni ai uhur biar do  jumpah bani goluh nami. Gati homa pusok do uhurni hasoman  na mangkaholongi hanami  halani lang setia hanami bani aturan na dob isatujui hananmi. Bani parsahap sonai pakon pangkawahnami pe, gati do mambahen pusok uhur ni hasoman halani lang mangkawah bani holongmu hanami tapi mangkawah bani pambahenan na hurang humbani hasoman do.

      K.     (Mandodingkon laguni sarupa pakon lagu Deideng ) Tuhan holong ma Ham bannami Bapa,  holong ma Ham

      P.      Hurang do pandalankononnami bani holong dompak hasomannami. Gati do hanami pitah mangidah na porlu bannami anjaha lalab lang marmalas ni uhur. Anggo adong hasoman ami na loheian, lang ibere hanami sidea mangan. Anggo horahan sidea lang ibere hanami sidea minum. Anggo hurangan pakean sidea, lang ibere hanami sipakeion ni sidea. Anggo boritan sidea, lang itonggor hanami sidea. Anggo ibagas penjara atap paruntolon sidea lang homa irohi hanami sidea.

      K.     (Mandodingkon laguni sarupa pakon lagu Deideng ) Tuhan holong ma Ham bannami Bapa,  holong ma Ham

     P.      Tangar hita ma Hatani Naibata  bagah bagah pasal hasasapan ni       dosa! Anjaha mangkopkop haganup do Ia matei, ase ulang manggoluh bani dirini bei na manggoluh in, tapi ase manggoluh sidea bani na dob matei anjaha mulak manggoluh mangkopkop sidea. (2 Korin 5,15). Hasangapon ma bani Naibata ibabou !

   P+K     Amen.

4. Mandoding Haleluya  No: 497.1-2

1.      Holong ni Jesus manggomgom ganup kuria

      Na patotapkon hasadaonta in.

      DameiNi in ma manrahut paruhuranta,

      Idop ni uhur batar-batarta in. 2x

2.      Riap ma hita sauhur martangkap tangan,

Ibagas damei na humbai  Tuhan in.

         Marpangarapan tongtong bai horja ni Tuhan

         Hataridahan ni hasintonganNin 2x

5. Mambasahon  Sibasaon Psalmen 66: 1 – 7 (sarupa model A)

6. Mandoding hal No: 408: 1 – 2

1.      Haleluya puji ma Tuhan, pasangap marhiteihon gondrang na laingan

         Irandu pakon inggou na lurlur homa tangaron

         Dodingkon ma doding  na baru Puji ma Ia bai hotakNi na ibabou Janah olobkon ma riap marmalas uhur.

         Sai tarbarita baen goranNi, Gok halongangan ganup jadi jadian Ni

         Puji Tuhan Haleluya.

2.      Marmegah gok tarima kasih, Halani ganup pasu- pasu ge layakNi

Hubanta na totap sirsir tong mambalosi.

Tunggung tumang do tong Tuhanta, Ia do Raja ni ganup sagala raja  Ningon hubaNi do unduk ganup marsombah

Sai tarbarita baen goranNi , gok halongangan ganup jadi-jadianNi Puji Tuhan Haleluya.

 7. Manaksihon haporsayaon

   P.  : Riap ma hita jongjong ! Saksihon hita ma haporsayaonta songon      na sinaksihon ni haganup halak na porsaya i sab tanoh on. 

 P+K   : Ahu porsaya bani Naibata Bapa pargogoh na so tarimbang sitompa langit pakon tanoh on…..psb

8.  Mandoding Haleluya  No  446 : 1-2

1.Sisada angkula do hita ganupan

   ragam ni pagori do hita tong tong

         Na sombuh bayak dos do in bani Tuhan

         Seng dong ilioi isarihon do tong

         Tuhanta do na gabe Hayu Anggur

         Ranting ni do hita on hajojor

         Jolom ma Jesus ulang ham pandur

         Ase tabun marbuah na ramos

2.Tanda ni sisada angkula do hita

   rap marparngarapan bani goluh on

Nai do bani horja rap marsiurupan 

Ulang dong na marsidalian ijin

            Tuhanta do na gabe Hayu Anggur….psb

9. Acara Khusus

       1.Tonggo Pangapition iujungi Tonggo riap Ham Bapanami

         Sitonggohonon antara lain :

·         Jubileum 100 Jemaat Paulus i Hagen Jerman

·         Pelestarian lingkungan hidup

·         Pergumulan setempat , pakon na legan

       2.. Mambasa Surat Tongosan humbani Pimpinan Pusat GKPS

           

       3. Responsoria  dalam rangka Minggu Kemitraan GKPS

             Bapa   : Bapa sonari lang songon Bapa sapari,

                          halani domma buei halak na porsaya

                          Horjahon hita ma na suman bani ganup ari

                          Ase goluhta ipasu pasu Tuhan Naibata

            Inang   :  Anggo laho hu Sidikalang,

                           Ulang lang das hu Taman Iman

                           Ase isobut hita inang, ianan na sonang,

                           Golgol martonggo marondos bani Tuhan.

            Naposo: Hita ganupan naposo, niombah dalahi pakon naboru Maningon tangi bani podah ni orang tua

                           Bani ganupan rencana ampa sura suranta ase marmalu Pangindo anjaha sousouhon hita ma bani Tuhan Naibata

            Bapa    :  Anggo mardalani hu Kotapinang

                           Ningon boluson do Aeknabara

                           Horas haganup niombah,bapa sonai age inang

                           Itumpaki Tuhan Naibatanta

            Inang    : Isuan hayu, habang ma  anduhur

                           Sogop hu atas rimbang

                           Hita inang ulang lang pintar maruhur

                           Ase ulang jumpahan imbang

            Naposo : Marhata ma anduhur i atas ni attarsa

                           Anggo iroboh hayu bulungni pasti melus

                           Haganupan pangindoan boi jumpah hita

                           Anggo ialamatkon hu bani Tuhan Jesus

            Kuria :    Ase boras sabur saburan ma

                           Tampei i atas pinggan pasu

                           Horas ma hita on haganupan

                           Sai Tuhanta ma tong tong namamasu-masu

10.  Mandoding Haleluya No 495.1-3

            1.   Roh ma ham na loja na ngayotan na mamorsan silang in

                  Jalo ma Tonduy Sipangurupi ulih si pasuang gogoh in

                  Tonduy Napnasing mambere gogoh

                  Lao mangkorjahon hatani Tuhanta in

                  Ulang magang ulang sangsi jolom ma poltik ulihta in

            2.   Roh ma ham na loja na ngayotan ,binahen ni dousamin

                  Jalo ma Ambilan Namadear ,ulih si pamalas uhur in

                  In ma hata ni Tuhan ta Jesus

                  Mambere buah in ma goluh na lihar.

                  Ulang magang ulang sangsi, jolom ma poltik ulihta

            3.   Roh ma ham na loja na ngayotan binahen ni horja in

                  Jalo ma Tuhanta Siparmonang, ase ipasonang ham ijin

                  Ipasirsir do haluahonta, na dob itobus hita humbai dousa in

                  Ulang magang ulang sangsi, jolom ma poltik ulihta in.

11. Ambilan: Johannes 16. 16 – 20

12. Manggalang

      P.   Paima ipatumpu hita galanganta, tangar hita ma hata ni Naibata na gabe onjolan laho manggalang  aima natarsurat bani: Psalmen 96.8: Bere Nasiamma bani Jahowa hamuliaon ni goranNi , boan nasiam ma galangan, masuk ma nasiam bani alamanNi.

13.Tonggo /Doding Galangan – Panutup-Pasu-pasu  

    ( Sarupa Model A anjaha lang pala be  Tonggo Ham Bapanami)

“Salam Minggu Kemitraan”